काठमाडौं, साउन ३० - तामाङ मिडिया अवार्डबाट यसवर्ष पत्रकारहरु फुलमान बल (कान्तिपुर दैनिक), सुनिल लामा (म्हेन्दोला फोले टेलिभिजन कार्यक्रम) र पुर्णिमा गोले (रेडियो मकवानपुर) सम्मानित हुने भएको छ । तामाङ सन्चारकर्मीहरुको छाता सङ्गठन तामाङ सन्चार समूहले प्रत्येक वर्ष तामाङ प्रसारण दिवसको अवसरमा यो अवार्ड प्रदान गर्दै आएको छ ।

भदौ १ गतेलाई तामाङ प्रसारण दिवसको रुपमा मनाउँदै आएको छ । २०५१ भदौ १ गते पहिलो पटक रेडियो नेपालको क्षेत्रीय प्रसारणबाट पाँच मिनेट तामाङ भाषामा समाचार प्रसारण भएको थियो । यससँगै तामाङ भाषाले विद्युतीय प्रसारणमा प्रवेश पाएको मानिन्छ । यसै दिनलाई तामाङ सन्चारकर्मीहरुले तामाङ प्रसारण दिवसको रुपमा मनाउने गरेका छन् ।

यस वर्ष तामाङ प्रसारण दिवस विभिन्न कार्यक्रमसहित मनाउने तयारी गरिएको छ । तामाङ सन्चार समूह केन्द्रीय समितिको आयोजनामा भदौ १ गते 'सम्मान तथा अन्तरकृया कार्यक्रम' हुने भएको छ । राष्ट्रिय सभा गृह, प्रर्दशनीमार्गमा दिउसो १ बजे 'ताम्सालिङको आन्दोलन र तामाङ सन्चारमाध्यमको भुमिका’ विषयक अन्तरकृया गरिने समूहका अध्यक्ष जगत दोङले जानकारी दिएका छन् । सोही कार्यक्रममा तामाङ मिडिया अवार्डबाट पत्रकार फुलमान बल, सुनिल लामा र पुर्णिमा गोलेलाई सम्मानित गर्न लागिएको उनले बताए ।

त्यस्तै तामाङ सन्चार समूह मकवापुर शाखाको आयोजनामा भदौं १ गते सम्मान तथा अन्तरकृया हुने भएको छ । होटल ओभरसिजमा कार्यक्रम बिहान ११ बजे सुरु हुने आयोजक संस्थाले जानकारी गराएको छ । कार्यक्रममा तामाङ सन्चारकर्मी र बुद्धिजिवीबीच अन्तरकृया तथा डा.गणेश बल र लोकगायक सोमबहादुर ग्लानलाई सम्मानित गरिने मकवानपुर शाखाका अध्यक्ष आदर्श थोकरले जानकारी दिएका छन्।

तामाङ सन्चार समुह दोलखा शाखाको आयोजनामा भदौ १ गते चियापान कार्यक्रम हुने भएको छ । सदरमुकाम चरिकोटमा हुने उक्त कार्यक्रम बिहान ८ बजे सुरु हुने जनाएको छ ।

यसैगरी तामाङ राष्ट्रिय मुक्ति मोर्चा प्रचार समितिको आयोजनामा भदौ ४ गते ‘पहिचान सहितको संघीयता र तामाङ सन्चारकर्मीको भूमिका’ विषयक अन्तरकृया कार्यक्रम हुने भएको छ । उक्त कार्यक्रम मध्यान्न १२ बजे अनामनगरस्थित जागरण नेपालको हलमा हुने समितिका अध्यक्ष सन्चु ब्लोनले जानकारी दिएका छन् ।