-विष्णु दोङ तामाङ

काइपा चन्द्र कुमार दोङ
पाङनोन तोमा हृयाङला चर्चित वरिष्ठ काइपा चन्द्रकुमार दोङ उमेरसे खेप्पा दोके लासाई जिउडाल तेन् रंग रुपदा च्यामा ओम् थेला ग्ल्यामरस गेटप तेन थेनिला हाउभाउदा म्राङमा क्योलोलोला टिन एजला छामेकादे पटयाप आदा बिसी पाङवारी आखाम । माया प्रेमला हृवाई ल्हामा कोसी जातुगुकादेला योनान पेते ताइना लाबा, उमेर छयोबा ब्योनछामेजुकुदा सेम चउचउ ताना लासी तोर छयोङ मार छयोङ ताना लाबा ओम् ग्राम्बा ज्योम्सी थोपोरी क्रा सार्पा नाम्सा खिम्साला आखे-मामजुकुदा सुताइ वैंशरी दोना लाबा काइपा चन्द्रकुमार दोङला गायन यात्राला विशेषता हिन्ना । च्याङनारी ग्यारजा ङहा बिमा ल्हामा तामाङ हृवाईकादे कोसी जिन्बा काइपा चन्द्र कुमार दोङसे क्योङ नेपाली हृवाई संगीतरी नोन ह्राङ्ला छुट्टोन खालला फाडको छेप्सी जिन्बा मुला ।

काइपा प्रेम लोप्चन
ल्हामा राङवा तामाङ सेलो जुहारी हवाईकादे कोसी चर्चारी खाबा वरिष्ठ कलाकार प्रेम लोप्चन खाब्बाई बिमा ल्हामा ब्योन स्होबा कलाकार एन् हिन्ना । नृत्य निर्देशनला थुमरी क्योङ नेपाल हृयुलरीन ख्याती कमाप लासी जिन्बा प्रेम लोप्चनला कलाकारिताला ताम ह्राङलान ग्लारी मुला तर खेप्पा दोसाइ जाईलेन ब्योन जेगेन स्होसी ब्रापा वरिष्ठ कलाकार प्रेम लोप्चनला ताम पाङबा थोपोला क्रा तेन् ब्रापा स्टाइल क्योलोलोला ब्योनकादेला ह्राङबान म्राङला । पाङनोन तोमा चु वरिष्ठ कलाकारला पक्कान ग्ल्यामर गेटप तेन् हाउभाउ प्रष्ट म्राङबारी खाम्ला ।

रोज मोक्तान
फ्लिक च्यामा सोझो तर चुल्वुले खालला वरिष्ठ गायक रोज मोक्तानला सांगीतिक यात्रारी कादे छामेकादे खाजी ? थेसे कादे ब्योन स्होजी ? बिबा ताम ह्राङलान ग्लारी मुला । तर ल्हुई गाङसल दिङ निसि जिन्साई चुल्बुले हवाईकादे कोबासे लासी चुल्वुले सोल्टा तेन् सोल्टीनीकादेला ओन्छाङ रोज मोक्तान प्रख्यात ताबा हिन्ना । तामाङ हृवाई, तामाङ सेलो तेन् क्योङ नेपाली हृवाइसंगीतरीन्  ह्राङला साङ्गीतिक पहिचान ओन्सी जिन्बा वरिष्ठ कलाकार काइपा रोज मोक्तानदा ग्ल्यामर गेटप तेन हाउभाउरी म्राङबारी खाम्ला ।

रामबाबु योञ्जन
तामाङ हृवाई संगीतरी परिचित मिन रामबाबु योञ्जनला फिरक्याप गेटप सिम्पल नोन म्राङला । ओदे निना ग्ल्यामर खासाई जा आम्राङ । ल्हामाराङ्बा सेन्टिमेन्टल हवाईकादे कोसी चर्चारी खाबा काइपा रामबाबु योञ्जनला सेमजा ल्हामान चकचके ह्राङबा म्राङला । तिल्दा विसाम जेबा कुटुम्बा खालाई छामे स्याब्जी बिसाम थेसे ख्लाबा चान्स ल्हामान कम ताला । माया पिरतीला तामरी ख्याल ठट्टा लातोमा साहित्यिक कला प्रयोग लासी मिनेट गिरिन् छामे पट्टयाप लाबारी खाम्बा आँट हृयाङला सोझो ओन्छयान काइपा रामबाबु योञ्जनदा म्राङबारी खाम्ला ।

काइमो तुलसा वाईवा
ग्ल्यामर गेटप तेन हाउभाउ चर्चित काइमो तुलसा वाईबारी कादे म्राङला ओम ? चु जा तुलसा वाईबादा ह्रुप तामा ज्याना लासी च्यागो हृया ? तर चु ताम जा ज्याना लासी विचार लास्हृयुगो कि उमेर छयोसाइ विवाह आलाना टिबा तुलसा वाईबादा ह्रुप ताबा विमा ङ्हाँच्छा ह्राङलान गेटपदा मूल्याङ्कन लास्हृयुगो । तिल्दा विसाम ह्राङलान गेटपदा तुलसा वाईवासे सेम लावारी खाम्ला वा ? तामाङ सेलो हृवाई संगीतरी ह्राङला पहिचान स्होसी सेलो नेपाली हवाई संगीतरी सुतान् स्थापित तासी जिन्बासे चर्चित काइमो तुलसा वाईबाला ग्ल्यामर गेटप ओदे निना आम्राङ । पाङनोन तोमा काइमो तुलसाला च्याबा मी तेन् नेबा सुङ्‌री विशेष आकर्षण म्राङला । 'चौबन्दी' मिनला चर्चित सेलो आधुनिक हृवाईला एल्बम बजाररी बापा काइमो तुलसा वाईवा रेडियो नमोबुद्ध एफ.एम. १०६.७ मेगाहर्ज काभ्रेला रेडियोकर्मी नोन हिन्ना ।

काइमो इन्दिरा योञ्जन
ग्ल्यामर गेटप आरेसाई फोटोरी तिलाइ ग्ल्यामर म्राङवा, च्यासी टिमा लिरि आकर्क गेटप तेन हाउभाउ म्राङवा अविवाहित चर्चित काइमो इन्दिरा योञ्जन सेलो हृवाइसंगीतला म्हेतोगि हस्ती हिन्ना । रेडियो नमोबुद्ध १०६.७ मेगाहर्ज, काभ्रेरी ङिसरेला तिरेम शनिवार योला १०:००-११:०० दोनारी स्हेङसी खावा 'सेलो सौगात' गेताङला प्रस्तोता इन्दिरा योञ्जनला 'चौबन्दी' सेलो एल्वम चर्चारी मुला । स्हृयान्दो न्हाङला तामकादे गोबा सेम मुसाम चट्ट ब्योन स्होसी अविवाहित छामे चर्चित काइमो इन्दिरा योञ्जनदान् सुटुक्क ह्रुप तासी ङ्योइमा जा ज्याबा ताला हृया ?

काइमो योगिता मोक्तान
तामाङ हृवाई संगीतरी चर्चित मिन योगिता मोक्तानला गोप्य तामकादे लातोमा कुनै ताम डिक्पारी खाम्ला कुनै ताम ओदेनिना आडिक्पारी खाम्ला । आडिक्पा जा चु कारण कि थेला वास्तविक तामदा सुक्ष्म अध्ययन आलाना थेलान ङाम्ला ह्रोकादेसे पाङबा तामला भररी तामसोर ब्रिबासे हिन्ना । चुरी काइमो योगिता मोक्तानला ग्ल्यामर गेटप तेन् हाउभाउला वास्तविक ताम थान्बान मुला । चुरी म्राङबा काइमो योगिता मोक्तानला फोटोरी तिलाइ ग्ल्यामर आरे बिसी खालाइसे पाङबारी आखाम । तिल्दा विसाम काइमो योगिता मोक्तानला ग्ल्यामर गेटप तेन हाउभाउ पक्कान म्राङला । तामाङ हवाई संगीतरी थेला काइरी ग्ल्यामरस काई प्रष्ट म्राङला । दाते 'मैच्याङको माया' मिनला चर्चित नेपाली सेलो एल्वम वजाररी बापा काइमो योगिता मोक्तानला च्याबा मि ल्हामान आकर्षक म्राङला । अविवाहित चु काइमो चर्चित योगिता मोक्तानला फोटोदा फ्लिक च्यामा मोडलिङ लाबा स्थापित मोडल ह्राङबा म्राङला । 

काइमो शसिकला मोक्तान
वाह! ग्ल्यामरस गेटप तेन् फोटो शसिकलाला ? पक्कान् हिन्ना चु चर्चित काइमोसे ग्ल्यामरस गेटपरी मोडलिङ लासाम मोडलिङ थुमरी नोन स्थापित ताबा सम्भावना चुनोन फोटो च्यासी पाङबारी खाम्ला। फ्लिक च्यामा ल्हामान सोझो ताइस्या ह्राङबा म्राङबा काइमो शसिकला मोक्तान तामाङ साङ्गीतिक थुमरी चर्चित मिन हिन्ना । दर्जन गिक बिमा ल्हामा तामाङ ग्योइला चलचित्रकादेरीक्यार ओम् दर्जनौ एल्वमकादेरीक्यार सयौंला संख्यारी तामाङ हृवाईकादे कोसी जिन्बा दोरम्बा-४, रामेछाप जोङरी केवा किन्सी दाते याम्बुरी टिसी ह्‌वाई कोबान छामे स्होसी टिबा काइमो शसिकला मोक्तानसे दाते ह्राङ्ला चर्चित सोलो एल्बम 'नाचुँ नाचुँ' आधुनिक सेलो बजाररी बापा मुला । ल्हामान एल्बमरीक्यार सेन्टिमेन्टल हृवाईकोसी खाबा थेसे दोर्सेला ब्योनछामेजुकुदा सेम ताङ्बा हृवाई संगीत युबा मुला । 

phyafulla_dongbishnu@yahoo.com